إيهما تحب زواج الحب أم الزواج التقليدى

بسم الله والصلاة والسلام على رسول الله

ونقول ايهما تفضل زواج الحب ولا الزواج التقليدى موضوع مهم واى حد بيتعرضله سواء ولد او بنت

نتناقش الاول ونقول اولا الجواز عن حب يبقى الولد او البنت واقف قدام اهله وعمال يجرب كل وسائل الانتحار علشان يوافقو مرة يرمى نفسه من البلكون ومرة يقطع شرايين ايدة ومرة يشرب تنر

وبعدها يخضعوا الاهل لرغبه ابنهم او بنتهم وانا شفت حالات كتير كدة ومبروك يتجوزو وبعدها يعيشوا احلى شهر عسل زى الافلام كده ومفيش 6 شهور الا وتلاقى كل واحد فيهم رايح لاهلة اما متجبس او واخد بوكس فى وشه

وتبدأ الام فى النواح انا قلتلك من الاول انتى مسمعتيش الكلام كنتى سمعتى كلامى وخد عندك كلام لحد ماترجع تانى بيتها وتبص البنت تشوف حبيبها اللى كان كله رومانسيه وعطف وحنان اتقلب أصلع من كتر التفكير فى البيت والمصاريف وهموم الشغل وساعتها بتسال نفسها هوه دة اللى انا حبيته ده بقى اقرع من كتر مابيشد فى شعره

وتحس انها اتسرعت وانها كانت لازم تسمع كلام اهلها وكلامى برضة بالعكس بالنسبه للولد

يلاقى البت المزة تحولت بقت اما بالمطبخ او شايله العيال او بتخانق فى الجيران علشان الغسيل بتاعهم بينقط على الغسيل بتاعها

راح فين الحب؟
ـــــــــــــــــــــــــــــــــــــــــــ
ونيجى للجواز التقليدى جواز الصالونات ودة الواحد اتعرضله ياما احساس بايخ مووووووت هوة رايح متأنتك هوة وممته ورايحين ايد ورا وايد قدام واحنا شاريين جاتوهات وشوكلاتات وماسحين البيت وغسالين السجاد ومنفضين ولا كانه يوم العيد وجاى عايز المواصفات تكون جميله وجسمها كويس وطولها كويس وفيها شبه من ياسمين عبد العزيز وهوة شكله يخاف يبص فى المرايه لحسن المرايه تتف فى وشهiiiiiii

وتدخل الوحدة مننا لابسه اللى عالحبل وبتقدم العصير ووشها بيجيب صهد وهما مبحلقين فيها والعريس يروح يتفرج وجايب عيلته معاه وجرانه يتفرجوا معاه واقعدى ياحبيبتى انتى مكسوفة ده هايبقى جوزكiiii

وبتبقى ساعة بايخة ورخمة واحنا مبننطقش لااحنا ولا ام العروسه وام العريس نازله رغى ابنى اصمله عليه النبى حارسه وصاينه راجل ولا كل الرجالة مال وجمال وعيله يعنى هاتناسبو عيلة العكش احسن عيله وهما اصلا بياعين بليلة وعندنا شقة ترمح فيها الخيل وهيه اوضه وصاله ومن غير حمام بالعافيه تحط فيها رجلك وخد عندك رغى ومدح

وبيبقى موقف زبالة البنت بتحس انها سلعة فى سوق يايوافقوا بيها يا لا والولد لو اترفض امه تقوله هاجبلك وحدة احلى منها دى حته وحشة كدة ومتقنعرة على ايه؟

ومن هنا بيبدأ الاهل فى الزن على بنتهم او ابنهم علشان الموافقة يابت ده حلو تقولها مش عاجبنى مامتها ترد يامنيله الراجل مش بشكله ده بجيبه منا متنيله متجوزه ابوكى بقالى خمسين سنه وزى التمثال لابكل ولا بمل

تقولها ده احول ياماما ترد بيتهيالك ده من الكسوف بس تقولها ده مبيعرفش ينطق كلمتين على بعض تقول من الموقف يابت بكره متلاحقيش عليه كلام وزن زن لحد ما توافق وكانهم عايزين يخلصوا منها ودة موضوع تانى عايز مناقشه وتوافق البنت وتقنع بكلام امها

واتجوزو وهنا المصيبه بتدخل البنت على واحد وشخص متعرفوش خطوبة سنه كل حد بيظهر فيها الحاجات الحلوة وبس

وبتجرب وبتبقى البطيخة ياحمرا ياقرعة وبترضى بنصيبها وبتعيش وكلها عيشةوالسلام وتقول وانا اما اطلق هاخد ايه هاتجوز تانى وهاتجوز ايه اما واحد عنده عيال ومراته ماتت يا واحد كبير فى السن ولادة اتجوزو وعايز ممرضه مش زوجة

تقول ادينى عايشة هنا احسن من المرمطة وهكذا امثله كتير

والعكس على فكرة انا يمكن بعبر اكتر عن البنت عشان انا بنت وبقول اللى حاساه لان فى ناس بتقول انتى متحيزة للبنات وده طبيعى

ــــــــــــــــــــــــــــــــ
طبعا منقدرش نهمل جواز القرايب لان دة بقة مصيبه تبقى البنت خالتها او عمتها او حد من قرايبها جاى ومتاكد بالموافقه

علشان اهل وهنا الموقف بيبقى محرج لان مينفعش الاخ يرفض ابن اخوه او اخته ولو رفض بيقاطعه العمر كله فيضطر يوافق علشان ميخسرش اخوه ولو رفض وتيجى البنت تتخطب يقولو هما رفضونا علشان خاطر ده وحروب ومشاكل العمر كله

نيجى لجواز الانترنت واوووووووووووو ظهرت فى الاونه الاخيرة جواز الانترنت الواد يعرف البت ويتجوزو وبعد الجواز الاتنين يلطمو على اليوم اللى عرفو بعض فيه

مش عايزة اطول عليكو عشان حاسه انى طولت قوى وانا على فكرة مش باصة للمواضيع بنظرة تشائميه انا بس بفتح لكو المجال علشان نتناقش

وانا من رايي ان الله الموفق وان البنت خاصه لازم تعرف هيه عايزه ايه وتمشى حياتها بالشكل الكويس وتفكر كويس قبل ماتاخد قرار الجواز فى اى نوع منهم واكيد لو كانت بتتقى الله فى حياتها ربنا هايرزقها بابن الحلال اللى يصونها وربنا يكرمكم جميعا يارب

مستنيه ردودكم وارائكم تفضل الجواز عن حب ولا الجواز التقليدى ولا القرايب ولا النت وليه؟ ونتناقش بصراحة اختكم الضغننة ساندى

[img][/img][img][/img][img][/img]

بجد مشكوووووووووووووووووووره جدن موضوع حلووووو واتمنه ليكي التواصل يارب يخليكي

,والله انتي عقدتيني مزمزيل سانده من الجواز لا الحب نافع والتقليدي نافع ولا النت نافع ولا القرايب نافع امال اتجوز منين بس الموضوع كتير جميل ومن واقع الحياه وشيق ودمك خفيف وشكرا علي الموضوع الرائع واتمني لكي زوج بعيد عن هذه المواصفات