بسم الله والصلاة والسلام على رسول الله
يالهوى ده طلع مش بيغسل سنانه بسيجنال تو !
موضوعنا انهارده عن الصدمات اللى بياخدها الولد والبنت بعد الجواز وخصوصا بعد شهر العسل مايخلص وكلام الحب والرومانسيه يتمل منهم ولانى متاثره جدا بكتاب عايزه اتجوز قلت نكمل كلامنا خلينا نبتدى ونقول
لما صحبتى اتجوزت رحت ازورها والطبيعى كلام البنات وفضول اى بنت انها تعرف الجواز اخباره ايه مع صحبتها لان اى بنت بتكون خايفة جدا من الحياة الجديده ومرورها بتجربه تحمل المسئوليه والحياه الجديده اللى لازم تتلائم معاها وتتعود عليها
المهم وطبعا دار حوار طويل سألتها اخبار الجواز مبسوطه ? ردت الحمد لله
ايوة يعنى الوحده تتطمن اصلى مرعوبه من حكاوى البنات وطبيعى ان اول فتره بتكون صعبه وحتى اللى بيكونوا خدو بعض عن حب بيحصلهم مشاكل
ردت وقالت انا كنت زيك كده الواحدة بتفكر ان حياتها هاتبقى بمبى وبتطلع كحلى عشان بنتخيل كتير سيبها كده ومتفكريش كتير عشان هاتتعبى بعدين قلتلها الله يطمنك ردت وقالت
ما انتى عارفة انا اخدت جوزى عن حب ومع ذلك لازم تحصل مشاكل لان كل واحد فينا بيشوف حاجات بعد الجواز مشفهاش ولابنعرفها الا بعد الجواز
ومن هنا
وهل ممكن في يوم من الأيام الحب يخلص؟ ويتبدل بالأعباء والمسئوليات والماديات؟
طيب نشوف امثله
من حب رومانسي لنكد وقرف!
التحول من الحب الرومانسي المجنون المندفع، لعلاقة رتيبة ومملة ولسؤال "هو أنا إيه اللي خلاني أحبَك أو أحبِك من أصله؟" ممكن يبدأ من أول الدخول في الجد.. يعني من أول ما يقول لك "بابا هيكون موجود في البيت يوم الخميس؟" أو "أتمنى إنك تشاركيني حياتي"..
طب ليه؟
خلينا نتخيل الحوار ده:
سها بتتطبخ، وأحمد جوزها قاعد قدام التليفزيون:
سها: أحمد.. مش هاتيجي تعمل السلطة؟
أحمد: بس كده.. أنا جاي حالا يا حبيبتي
يدخل أحمد ويبص على البوتاجاز.. طابخة لنا إيه النهاردة يا حياتي؟
سها: صينية بطاطس
أحمد: ومال لونها مخطوف كده ليه؟ هي مش بصلصة؟
سها: احنا متعودين نعملها كده في بيت ماما.. بصلصلة ازاي يعني؟
أحمد (بإحباط): طب فين خضار السلطة؟
سها: البصل والخيـ..
أحمد: إنت بتعملي السلطة بالبصل؟ ماما عمرها ما عملت كده!
اللي بيحصل في الفترة دي هو الانتقال من مرحلة الصفات.. جميلة وأمورة وطيبة ومؤدبة..(أو أمور وطيب وابن حلال) لمرحلة التنفيذ.. تنفيذ المهام المعينة المطلوبة من كل واحد على حسب جنسه وعلى حسب طريقة تربيته وتوقعاته مش بس في الأكل زي الحوار اللي فات..
مثلا..
ممكن العريس يتوقع من عروسته إنها تقوم بكل المهام المنزلية من طبخ ومسح وكنس.. تروح السوق وتغسل الهدوم وتحضر أعياد الميلاد وتحفظ المجاملات.. وتشتري الطلبات اليومية في البيت. وبعد كل التوقعات الأساسية دي، ممكن كمان يتوقع إنها تحضر له فطار مخصوص يوم الجمعة مع الجرنان في السرير، وبعدين تنزل تتريض معاه في النادي شوية. يمكن يكون ده فعلا أسلوب الحياة اللي هو متعود عليه، وشاف أهله بيعملوه وإن هي دي الحاجة "الصح" اللي "المفروض" تحصل.
مش الرجل بس هو اللي بيكون حاطط توقعات للست اللي هيتجوزها، الست كمان بتكون حاطة قائمة توقعاتها.. يعني مثلا إن جوزها ياخد باله من كل المهام الرجولية (هع!).. زي مثلا تصليح العربية ودفع الفواتير.. الإيجار والميه والغاز والتليفون.. برضه ده لا يمنع من تصليح أي حاجة صغيرة بايظة في البيت.. فيشة يركب لها سلك.. بلاعة مسدودة يسلكها.. بالإضافة لأنها تحب إنه يساعدها في المطبخ أو في الغسيل مثلا.. التوقعات دي برضه ممكن تدل على النشأة.. ممكن يكون يوم الجمعة أو الإجازة بالنسبة لها مختلف.. زي تقضيته في بيت العيلة مثلا..
ولأن الاتنين المرتبطين ببعض نادر لما بيتكلموا في توقعات دقيقة زي كده، الواقع اللي هيحصل بعد كده نتيجة للاختلافات دي ممكن يكون محبط جدا.
والحل: اتكلموا عن حياتكم مع بعض في المستقبل إن شاء الله.. وبلاش قايمة التوقعات الطوييييلة دي!
خلي أفقكم واسع، ورحبوا بالاختلافات بدل ما تهاجموها.
كل شيء انكشفن وبان!
في سنة أولى جواز، العرايس الجداد من المتوقع إنهم يصابوا بنوع من أنواع الاكتئاب.. عارفة إن الكلام ده قد يبدو غير منطقي لأن الناس مفهومها إن شهر العسل وسنين الجواز الأولى بتكون أحلى ما فيه. والحقيقة غير كده.. لأنك في الفترة دي بتشوف حاجات وبتتحط في مواقف عمرك ما اتحطيت فيها قبل كده مع الشخص ده..ومش كل الحاجات تعجبك:
منال مثلا كانت بتتكلم على اليوم اللي لاحظت فيه إن عريسها عنده كرش فبتقول:
كنا قاعدين بنتفرج على التليفزيون وكان قايم داخل يجيب إزازة ميه من التلاجة. وقبل ما يروح كان واقف بجنبه واتمطع جامد.. فشفت كرشه الكبير.. بصراحة اتصدمت.. حسيت إني عاوزة أعيط أو إني اتضحك عليا!.. دخلت الحمام وقفلت على نفسي وماخرجتش غير بعد ساعة وكلي اكتئاب..
ولما منال فكرت في سبب اكتئابها الفظيع ده.. اكتشف إن ده ليه علاقة بوالدها:
"بابا كان كرشه كبير جدا.. وكان كسلان جدا وعمره ما كان بيساعد ماما في حاجة حتى لو طلبت منه ده.. وأنا كنت متعلقة بماما جدا وكانت بتصعب عليا وهي بتشتغل في البيت لوحدها وهو نايم قدام التليفزيون"
والنصيحة هنا: قبل ما تحبط لما تشوف حاجة ماتعجبكش لأول مرة، فكر في سبب رد فعلك العنيف قوي ده.. هل عشان هي حاجة تزعل ولا عشان مربوطة بحاجة في الماضي؟ وفكر كمان في حجم مشاعرك ناحيتها.. هل تستحق كل الغضب ده؟ ولا إنت مهول الموضوع؟
ده بالنسبة للصفات المش كويسة اللي ممكن نكتشفها، بس حتى الصفات الجميلة اللي حبيناها في الطرف الأول ممكن تكرهنا فيه.. هتسألوني ازاي؟ طب بصوا على الأمثلة دي
لو حبيتها عشان منطلقة وبتعرف تعبر عن نفسها ببلاغة..
تتحول إلى: عاقلة زيادة عن اللزوم
لو حبيتيه عشان هادي ومش بيتكلم كتير غير في الجون
تتحول إلى: أنا حاسة بالوحدة ومش لاقية حد أتكلم معاه
لو حبيتها عشان هي على طبيعتها وشجاعتها وجموحها
تتحول إلى: هي مش بتتهد أبدا! أنا حاسس إنها صدعتني!
ده غير اهلى واهلك ان بسلامته ماما كانت معوداه تقوله قبل ماينام ننه هوووو فبيبقى مستنى مراته تعمله كده ومراته مش فاضيه بتسيق المطبخ عشان النمل والصراصير
يقولها بيبى تعالى بقه
تقوله حاضر هاخلص واجى
بيبى عايزة انام
تقوله متنام وانا ماسكه عنيك
يقولها انا مبنمش الا لما ماما تطبطب عليه وتحكيلى حكايه لحد ما انام
والغلابه التانيه تايهة ورا الصرصار بالشبشب لحسن يجيب اخواته وعيلته كلها وييجوا يعيشوا عندهم
فبيبقى الراجل مستنى نفس معامله ممته مع زوجته ولازم نفهم ان علاقه الام والاب غير الزوجه نهائيا ده موضوع كبير كبير كبير
لازم نبقى نفتحه مره تانيه
الحل:
أهم شيء في التعامل مع الاكتشافات من النوع ده، إنك تبعد عن الجمل من نوعية "مش هي دي الإنسانة اللي أنا أرتبط بيها" أو "مش هو ده حبيبي بتاع زمان"..
الحقيقة إن
• مفيش إنسان كامل
• وإن مفيش حد فيكم اتغير
• والشخص اللي إنت ارتبط بيه ماكانش بيمثل عليك ومخبي حقيقته عنك طول فترة معرفتكم.. ولا حاجة..
الفكرة إن لما طبيعة العلاقة بتاعتكم تعمقت شوية، ومساحتها كبرت، اتعرضتم لكمية من المعلومات ماكنتوش تعرفوها قبل كده بحكم العشرة.. والحل الوحيد للتعامل مع الموضوع ده هو عن طريق التفاهم.. وتقليص القائمة الطويلة العريضة بتاعة توقعات كل واحد منكم.. والأفضل لو قعدتم مع بعض واتكلمتم فيها وناقشتوها.. وكتبتوها مع بعض.. وعموما المشاكل اللي من النوع ده – أو من أي نوع بصراحة- عمرها ما بتتحل غير بالكلام.. يعني لو فيه أي حاجة مضايقاك أو شاغلة بالك، اتكلم عنها مع الطرف التاني وعبر عنها بهدوء وحب.. واوعى تشيل في نفسك..
دلوقت بقى.. عاوزين نسألكم إنتم..
سواء كنتم متجوزين أو خاطبين أو على وش خطوبة..
اكتشفتم إيه في الطرف التاني ماكنتوش شايفينه؟ وإيه كان رد فعلكم؟
طبعا فى امثله انا اقتبستها من كــــــــتـــــــــــاب عــــــــــايزة اتجـــــوز
طولت عليكم معلش وربنا يستر علينا لحسن حاسه انى هاقع فى واحد اقرع اصلى بكرههم اوى عشان كده شكلى ربنا هايوقعنى فى واحد منهم يبقى الواد لابس فلنه اخوه الصغير عشان تبقى ماسكة عليه وحالق ظلبطه ورايح نافخ عضلاته عند العجلاتى يالهوى ربنا يستر عليه ههههههه انا بهزر انتو صدقتوا اتمنى الموضوع ينال اعجابكم
اختكم ساندى خدو بقه الصوره الجامده دى
موضوع: صدمات سنة اولى جواز 
